RESULTADOS do CAMPIONATO DE GALICIA SUB10/12/14 PC (24 febreiro, Ourense)

Récord galego e numerosas marcas persoais as que tiveron lugar o domingo 24 de febreiro no CAMPIONATO DE GALICIA SUB10, SUB12  e SUB14 EN PISTA CUBERTA, que foi acollido un ano máis na pista cuberta de Ourense.

A medida que ía avanzando a xornada, mellores resultados ían acadando os nosos e as nosas atletas, que con esforzo conseguiron meterse entre os dezaseis mellores rexistros da nosa Comunidade Autónoma e participar nesta loita deportiva polos títulos galegos no campionato de menores. A nivel individual, os representantes da categoría SUB10 amosaban a súa madurez nas dúas probas disputadas; por unha banda Uxío Vilariño, que lograría rematar entre os dez primeiros en lanzamento de peso no ránking galego, cun rexistro de 5.68 metros; e Carlos García, que tras mellorar a súa marca persoal de 0.95 m. lograba o terceiro posto cun salto de 1.03 metros, subindo ao podio para traer consigo a merecida medalla de bronce.

Na SUB12 non sería menos e tamén volverían con merecidas medallas para casa. Xavier Gómez doblaba participación no peso, cun mellor lanzamento de 6.32 metros, e no salto de altura, onde acadaba a medalla de bronce logo de superar o listón nos 1.22 m., empatado en marca co segundo vencedor da proba. Nas rapazas, Eva Rouco, María Mourelle e Ilse Prado lograban clasificarse nas semifinais dos 60 m.l., mellorando as súas marcas e rozando o podio na final. Pero as vitorias virían nas segundas probas nas que participaban, coa medalla de ouro para Eva Rouco nos 500 metros lisos (1:29.09), rozando o récord galego (1:28.54); a medalla de bronce de María Mourelle na lonxitude, cun mellor salto de 3.91 m. e o cuarto posto para Ilse Prado na mesma proba, cun rexistro de 3.85 m. Nos 1.000 metros serían Noa Fernández e Safya Moumni as representantes do medio fondo, nunha carreira difícil na que remataron nos 3:40.84 e nos 3:46.44, respectivamente. Lily Mavsar debutaba no salto de altura quedando entre as dez primeiras, preto da súa marca persoal de 1.07 metros (1.03m.) e no lanzamento de peso, de novo Eyram Sefenu conseguía a medalla de ouro logo de enviar a bola aos 7.55 metros, que lle daban o primeiro posto na proba con mellor marca persoal.

Se aínda non eran suficientes as boas novas, a categoría SUB14 seguiría sumando no medalleiro e regalándonos un novo récord galego de pista cuberta por parte de Antía Pernas, que superaba o seu propio récord anterior nas semifinais e na final dos 60 metros lisos, con 8.11 e 8.22, respectivamente, cos que obtiña a medalla de ouro da proba; a mesma na que Andrés López conseguía a súa MMP con 8.66 nas semifinais. Pero como dous son mellor ca un, a piques estivo Antía de alcanzar o récord galego no salto de lonxitude (4.89 m.), no que remataba co primeiro posto do podio cunha mellor marca de 4.74 metros e a segunda medalla de ouro individual. No triplo salto, foron Alicia Rodríguez, Cristina Herrero e Estela Díaz as que participarían, deixando rexistros arredor dos 8 metros; mentres que esta última, Estela, repetiría nos 2.000 m.l., proba que remataba entre as dez primeiras chegadas a meta, detendo o cronómetro nos 7:46.77. Nos rapaces, o representante sería Teo de Frutos, quen tomaba parte nunha rápida carreira de 1.000 m.l. e remataba cun rexistro de 3:16.39, mellorando a súa anterior marca de 3:20.89

En canto aos metros valos, ían ser Xiana Ulloa e Nicolás Núñez os que disputasen os 60 m.v., quedando nas semifinais preto das súas marcas (12.44 e 13.32, resp.) e na proba de altura repetiría Nicolás Núñez, cun mellor salto de 1.48 metros que lle daban a correspondente medalla de ouro do primeiro posto; xunto co seu compañeiro Teo Penelas, que superaba o listón de 1.25 m. na altura e o dos 1.95 metros na pértega, co que conseguía o quinto posto a nivel galego.

Os demais concursos serían tamén moi favorables para o LUCUS CAIXA RURAL GALEGA nesta categoría, coa medalla de prata de Clara González na pértega, superando os 1.95 metros e o quinto posto no salto de altura, no que melloraba en máis de 10 centímetros a súa MMP, saltando sobre os 1.36 m. Na pértega masculina a medalla de ouro de Martín Vázquez, que subía ao primeiro posto do podio co seu rexistro de 2.45 metros e quedaba no quinto posto na lonxitude, cun mellor salto de 4.51 m. E no triplo salto, onde Andrés López sorprendía a todos/as cun boísimo salto de 10.35 m., que o subían ao primeiro posto como campión galego e lle daban a medalla de ouro, proba na que tamén tomarían parte os seus compañeiros de equipo Ángel Herrero e Víctor Cabarcos, que saltaron ata os 8.86 e 8.40 metros, respectivamente, e situáronse entre os dez primeiros do ránking autonómico.

GRANDE NORABOA, PEQUENOS E PEQUENAS GRANDES ATLETAS!!
Non esquezas compartir en...
Share on Facebook
Facebook
Tweet about this on Twitter
Twitter
Email this to someone
email

Deja un comentario

Tu dirección de correo electrónico no será publicada. Los campos obligatorios están marcados con *