HISTÓRICO ADRIÁN BEN, FINALISTA MUNDIAL

Logo do remate esta fin de semana do CAMPIONATO DO MUNDO DE ATLETISMO, que daba comezo o 27 de setembro no Estadio Internacional Khalifa e poñía fin o domingo 6 de outubro; aínda seguimos asimilando os resultados obtidos polos representantes da Selección Española desprazados ata Doha, Qatar.

©Instagram Adrián Ben.

De todos eles, non podemos evitar sentir unha inmensa alegría polo noso Adrián Ben, observando con orgullo como, pasiño a pasiño, vai facendo realidade cada un dos seus soños e amosándolle ao mundo enteiro o talento do que está feito. O certo é que a case ninguén lle sorprendía, pois xa desde pequeno deslumbraba coa súa innata forma de correr e facía prever unha longa carreira deportiva, pero o que fixo o pasado 1 de outubro no continente asiático foi histórico, conseguindo meterse na final dun Campeonato do Mundo e batindo todos os récords. 

Xa nas roldas semifinais da súa proba, os 800 metros lisos, deixou ver a súa valentía e coraxe dominando unha carreira na que rexistraba 1:44.97, mellor marca persoal de sempre e novo récord galego absoluto tras máis de 30 anos, que o converten no primeiro atleta de Galicia en baixar da barreira dos 1:45 minutos. Pero non só iso, este novo rexistro supón tamén a marca mínima para participar nos Xogos Olímpicos de Tokio 2020, todo un soño para Adri, que con tan só 21 anos xa forma parte da historia do atletismo nacional e internacional. 

Esta emoción mantívose ata o último momento, cando 48 horas despois de facer historia disputaba a final dos 800 m.l. como único representante da Selección Española, carreira na que puidemos vivir como deixaba a pel na pista e remataba cun increíble rexistro de 1:45.58, a súa segunda MMP que o convertía no sexto do mundo; SEXTO DO MUNDO!! Sen dúbida unha posición merecidísima que aínda nos costa crer e compartimos cun gran orgullo de cor verde.

TREMENDA NORABOA ADRI E FAMILIA, ES MOI GRANDE!!

©Imaxes tomadas do Instagram de Adrián Ben.

Non esquezas compartir en...
Share on Facebook
Facebook
Tweet about this on Twitter
Twitter
Email this to someone
email

Deja un comentario

Tu dirección de correo electrónico no será publicada. Los campos obligatorios están marcados con *