GRANDES RESULTADOS NO AUTONÓMICO SUB23 DE PISTA CUBERTA (19 xaneiro, Ourense)

O pasado domingo 19 de xaneiro repetimos o desprazamento ata Ourense para disputar o CAMPIONATO DE GALICIA SUB23 DE PISTA CUBERTA, onde os/as atletas do Lucus Caixa Rural Galega tomaban parte nas súas especialidades. O Campionato, que ocuparía a xornada da tarde, remataba con grandes resultados individuais, medallas e mínimas nacionais para ir aos Campionatos de España.

Xabier Rodríguez e Laura Santos.

O primeiro da xornada sería Xavier Esteban no salto de altura, que finalizaba o concurso cun rexistro de 1.88 metros, conseguindo a medalla de ouro e superando de novo os 1.85 m., manténdose na súa MMP. O noso especialista en valos, Santiago Rozas, faríase coa medalla de ouro nos 60 metros valados e un gran tempo de 8.67, que supón o seu billete para o Campionato de España SUB23 de pista cuberta. Tamén repetiría medalla de prata nos 60 metros lisos e nos 200 m. l., logo de rexistrar 7.39 na primeira das probas e 23.40 na segunda, actualizando a súa mellor marca da tempada e persoal.

En canto ao fondo, Xabier Rodríguez e Laura Santos serían os representantes do Club nos 3.000 metros lisos. Detendo o cronómetro nos 9:05.06, Xabier mantiña un segundo posto que lle concedía a medalla de prata da proba e actualizaba a súa MMP, baixando en máis de 15 segundos o seu anterior tempo. Pola súa parte Laura, quen semanas atrás xa conseguira a mínima para o campionato nacional na proba dos 1.500 m. l., lograba o primeiro posto da carreira e a medalla de ouro, cun gran rexistro de 9:58.49 que lle permite tomar parte no Campionato de España SUB23, a súa segunda mínima nacional en poucas semanas.

En resumo, gran xornada a deste Campionato de Galicia con pleno de podios para os/as nosos/as representantes, que voltaron con seis medallas das seis posibles e moi bos rexistros. Tedes os resultados completos no enlace posterior e algunhas imaxes.

NORABOA Á CAMPIOA E AOS CAMPIÓNS!

 

 

Non esquezas compartir en...
Share on Facebook
Facebook
Tweet about this on Twitter
Twitter
Email this to someone
email

Deja una respuesta

Tu dirección de correo electrónico no será publicada. Los campos obligatorios están marcados con *